Un grupo de responsables do Cabildo insular de Fuerteventura visitaron estes días as instalacións da Escola de Cantería da Deputación de Pontevedra, onde coñeceron o plan docente dos estudos que se imparten neste centro co obxectivo de poñer en marcha na illa canaria unha iniciativa semellante.

En concreto, a idea do Cabildo insular é, nun primeiro momento, poñer en marcha un plan de formación dirixido a persoas maiores de 30 anos desempregadas co obxectivo de obter o certificado de profesionalidade de nivel dous Colocación de Pedra Natural, co que se acredita o alumnado para colocar diversos elementos construtivos de pedra natural.

Os representantes canarios coñeceron de primeira man os traballos que o alumnado da Escola de Cantería desenvolve ao longo do ano e as experiencias de colaboración que teñen en diferentes países do mundo.